老字号故事之爱群大酒店：从独冠南天，到怀旧经典

爱群大酒店，坐落广州西堤江畔，1937年落成开业，是当时南中国最高建筑，并保持记录达三十年之久，开业时被新闻界誉为“开广州高层建筑之新纪元”，并以设备最新式、完善、豪华著称。1985年加建旋转餐厅，轰动一时。爱群大酒店曾接待众多政商名人，系好多海外华侨心中不灭嘅情结。记者今次采访到爱群大酒店办公室主任冯志全，喺爱群工作咗41年嘅佢，描绘咗爱群大酒店76年嘅历史变迁图景。

一出世就独冠南天

南都：爱群大酒店1934年兴建，1937年落成使用，喺建筑结构同风格上中西融合，独树一帜。当时嘅设计师，点解会选择咁样一种风格呢？

冯志全：当时起爱群，系参照咗美国摩天大厦嘅形状，又融入咗岭南嘅骑楼特色。当时类似风格有两个酒店，一个系广州嘅爱群大酒店，一个系上海嘅和平饭店。西方文化啱啱入嚟，采用比较先进嘅设计理念，可以话系一种时代特色。广州繁华嘅十三行一带，都系骑楼，爱群自然会融入岭南建筑风格。

南都：爱群嘅装修好有特色，好似黑白相间嘅地砖，就完全系民国风格。

冯志全：系啊，我哋而家仲有一层，可以睇到以前嘅地砖。包括以前旧楼嗰边嘅楼梯，系意大利批荡，七十几年过去，仲保留得比较好。所谓嘅意大利批荡，系用水泥加埋各种石仔，做成各种颜色嘅楼梯，而家呢啲工艺基本上都冇口架啦。仲有就系个楼梯扶手，都保留到而家，可以睇得出历史原貌。

南都：开业嘅时候，酒店设施相当先进，可以讲系比较豪华。

冯志全：整个酒店房间，从房门、床、沙发到梳妆镜，全部都系泰国金丝柚木做嘅。最早嗰阵时，浴缸同埋面盆，都系“美标”嘅。旧阵时嘅电梯都系用进口嘅，不过嗰个年代嘅电梯出面一道大铁门，中间一层铜铁闸，里面有个拉掣，左上、右落、中间停，系用人工嚟操纵电梯嘅。

南都：当爱群大厦落成嘅时候，系南中国最高嘅建筑。

冯志全：当时人哋讲一句话，“一枝独秀冠南天”，就系讲15层高嘅爱群。嗰阵时唔系净系广州，而系整个东南亚最高。啱啱开业嘅时候好轰动，当时好多政要名人包括孙科、于右任、余汉谋、李宗仁、宋子良等等喺开业嘅时候为爱群题词，仲有好多广州嘅富商同埋名流过嚟出席当时嘅落成开幕仪式。

南都：当时西堤一带，除咗爱群之外，仲有好多老牌酒店。爱群以乜嘢嚟傲视西堤酒店群？

冯志全：喺当时嚟讲，爱群走最高档嘅路线，酒店管理理念开先河，开业就有“酒店，旅客之第二家庭”嘅口号同定位。对侍应嘅要求亦非常严格，需要国语娴熟，识得简单嘅英文。当时李宗仁为爱群开幕题咗“宾至如归”四个字，呢四个字其实就系体现咗嗰个服务理念。爱群基本上系引入咗外国嗰一套服务理念，周到细致。有时客人病咗，服务员除咗问候，仲会帮佢煲埋药口架。

南都：爱群作为当时嘅高档酒店，一般人应该消费唔起嘞啩？

冯志全：好多华侨，以前喺度嘅时候，系只能够望下个高楼，入唔到嚟嘅。所以佢哋出咗去好多年之后，而家返到嚟，会想入一入爱群，当系还一个心愿。根据呢一点，我谂以前嘅客人都系非富则贵，平常百姓着件衫唔够企理，都唔敢喺门口经过。

风云变幻，依旧矗立江畔

南都：落成开业第二年，广州沦陷，爱群就喺江边，应该好容易变成日本人嘅目标。

冯志全：好彩当时冇炸到，但系日本仔喺占领广州嘅时候，即刻派兵占据咗爱群大厦。当时，日本仔为咗防空需要，将成栋爱群涂成灰黑色。后来点铲都铲唔甩，冇办法恢复返原本嘅面貌。而家已经睇唔返原来外墙批荡嗰个原状。

南都：“文革”对爱群嘅影响似乎并冇太大。

冯志全：“文革”时期，爱群照常营业，但系改咗个名叫“人民大厦”。当时广州有个交易会，爱群系好重要嘅涉外场所。当时嘅开幕式酒会，港澳及华侨客人，全部齐聚13楼，好虚撼。霍英东长驻10 33房，何贤住喺西楼1401房，马万祺住喺1601房。我哋都习惯晒，边个返嚟都肯定安排返固定嘅房间。上世纪六七十年代，交通冇而家咁发达，华侨回乡探亲，要先到广州先可以落去四乡。加上嗰阵时嘅接待设施严重不足，酒店数嚟数去得嗰几间，过年真系连走廊都加满床，一房难求。爱群又系当时比较高档嘅酒店，更加系皇帝女唔忧嫁。

南都：改革开放之后，爱群系几时着手装修改造口架？

冯志全：1980年，爱群引进港资，对酒店嘅供水、供电、供冷三大系统同埋客房、餐厅全面改造。改造后嘅爱群，仲喺十三楼龙凤厅恢复咗曲艺茶座，下午有粤剧演员唱粤曲，晚上会变成一个音乐茶座。音乐茶座系1980年代广州流行音乐嘅特色，培养咗好多广州流行歌手。去音乐茶座听歌，系当时好多年青人时兴嘅活动。封闭咗近半个世纪嘅爱群，对于普通市民嚟讲，总系有一种神秘感同高贵感，所以改革后嘅爱群，生意非常好。

南都：1985年，爱群喺顶层加建旋转餐厅，应该系当时轰动全城嘅事？

冯志全：首先，加建旋转餐厅，要拆咗原本14楼以上嘅两层塔楼，再起比塔楼面积大八倍嘅旋转餐厅，其中三分之二嵌喺15楼，三分之一系凌空嘅，难度可想而知。另外，坐喺旋转餐厅，唔需要移动半步，就已经可以一边饮茶食饭，一边将珠江景色一览无遗。当时招收服务员几乎拍得上选美。因为咁，想唔轰动全城都唔得。而且，广州人比较讲意头，个个争住嚟爱群旋转厅转运，特别系重阳节嗰日，有登高转运嘅习俗，一直到而家，都系旋转餐厅最爆棚嘅日子。

西堤式微，有竞争先有品质

南都：系咪西堤一带日渐式微嘅同时，爱群就开始走下坡路口架？

冯志全：爱群走下坡路，应该就系人民南搞咗个高架桥之后。以前有个讲法叫做“西壕不夜天”，西壕口一带系最旺口架。1970年代尾，开放咗冇几耐，广州最早嘅宵夜档，就系香港佬喺西壕口搞起身嘅。人哋夜晚就瞓觉，呢度正系“杯上杯落”嘅时候，灯火通明，真系不夜天！但系人民南高架一搞，成个西壕口传统商圈耷晒，大三元酒家、大公餐厅都冇咗，繁华一去不返。

南都：点解一条高架桥嘅影响会咁大呢？

冯志全：对爱群嚟讲，起桥嘅时候，道路封闭，交通唔方便，而当时广州又开始有好多新酒店出嚟，原来嘅熟客入唔到嚟，去咗其他地方，觉得其他都几好，就唔再返嚟。竞争并唔系一个唔好嘅现象，始终社会要发展口架。

南都：而家咁多新式酒店，爱群要点样面对呢种同业嘅竞争？

冯志全：全广州得三间中华老字号酒店，爱群喺其中之一。最近我哋要将以前嘅旧家私搜集返，打造两间怀旧经典房，畀顾客体验呢种历史文化嘅价值，包括一啲对爱群好有感情嘅老华侨，可以畀佢哋揾返嗰种回忆同感觉。年青人亦能够喺感受到老酒店嘅独特之处，了解爱群嘅历史文化。

南都：爱群聚焦咗大家嘅目光，呢个系负担定系动力？

冯志全：梗系动力嘞。点解大家要提意见，因为关心你，想你好。“你唔好唔见咗啊，我到老都要睇住你先舒服口架！”我印象好深刻，有个粤剧拥趸，盲公嚟嘅，佢再唔方便都好，都要嚟捧下场，对粤曲同埋爱群有个情结喺度。大家日日走嚟饮茶，成日返嚟住，其实就系我哋嘅“股东”。而家每年爱群周年庆都会回馈老街坊，爱群能够生存到而家，离唔开佢哋嘅信任同埋支持。其实老字号文化，就系一种感情嘅维系。

记者手记: 门前冷暖，情怀未变

西堤，曾经系广州最繁华嘅地方，齐集广州历史最悠久嘅酒店、酒楼、戏院，仲有兴旺一时嘅百货公司。

1980年代生嘅我，庆幸经历过西堤嘅繁盛。妈妈嘅外家喺人民南，所以我喺呢头都算系由细玩到大。以前父母带住我喺长堤饮茶、行街，每次望到嗰栋高楼，高到搏命鄂高头，都望唔到顶。阿妈同我讲：呢度就系爱群大厦喇，以前系广州最高嘅楼嚟口架！仲记得细个第一次去旋转餐厅，喺高处望到珠江景色，原来广州真系好靓。到而家，每次喺西堤江边散步，望向爱群，嗰种高塔入云同埋厚重嘅感觉，令我对呢个建筑嘅存在本身，仍然有种自豪感。爱群，始终系西堤最好嘅风景。

一路听冯主任讲爱群嘅历史，翻睇爱群开业嘅纪念刊，似乎时光倒流70年，返到去1930年代嘅广州。我好似一个喺长堤卖新闻纸嘅七岁报童，一边叫“号外，号外！摩天大楼开业啊”，一边喺参加开幕式嘅车水马龙中穿插，见到好多西装骨骨、皮鞋闪亮嘅名流公子，离远望到爱群嘅豪华大堂。只要想象，我亦跟住1930年代嘅广州人一齐，为爱群嘅落成激动咗一番。

后来，政权更替，社会变迁，爱群一直矗立喺江边，依然生意无忧。1980年代，装修改造，旋转餐厅、音乐茶座嘅诞生，将普通百姓迎入爱群，系最旺嘅时期。听阿姨讲，佢后生嗰阵时，好钟意去爱群嘅音乐茶座，当时朋友聚会又好，拍拖又好，都好兴去音乐茶座，嗰时广州有名嘅歌手，都会去嗰度唱香港流行歌。

呢一切嘅繁华，喺人民南高架桥建成后，一去不复返。好多人认为呢条桥挡咗龙脉，破坏咗风水。冯主任话佢并唔迷信，但系喺爱群做咗40年，真系睇住呢条桥一起，成个西壕口就日落西山。后来新酒店雨后春笋咁出嚟，爱群再都唔系皇帝女喇。

而家，爱群嘅设施落后咗、客少咗、楼旧咗，一直令广州人时刻担心佢嘅经营状况。因为，广州人对爱群有感情，依旧好上心。老华侨返广州一定要去爱群住下，老茶客一定每日都去爱群饮下茶、听下粤曲———确实，只要你行入爱群，佢嗰种怀旧嘅情调依旧，楼梯、扶手、地砖仍有当年风韵。其实，爱群嘅魅力，在于佢同广州人之间嘅嗰种感情联系，重视人同人之间嘅诚意。只要爱群仲有嗰一份人情味，注重贴心周到嘅服务品质，爱群就依然系爱群。系呢一份人情，令爱群仍然静立喺西堤江畔，长驻喺广州人心中。

[街坊话事]　佢哋为爱群而自豪

@老广老讲：旧时广州嘅童年伙伴，最钟意去嘅地方就系到文化公园听古仔睇木偶戏。由东往西经沿江路，穿越爱群大酒店嘅时候，必定喺骑楼廊中嘅一条条大柱之间绕来躲去，面兜江风，再看花尾艔泊拖。待侍应生不留神，即刻右门入左门出，闪溜滑进大堂，为尝踏光滑花阶砖嘅滋味，同埋睇一眼头顶打转生风嘅电风扇……忘不了嘅爱群童年。

@猫猫何小猫-：嫲嫲同爷爷日日都去爱群饮早茶，阿嫲话，“后生我喺广州最高嘅旋转餐厅做企堂，返工日日欣赏一线江景，服务过好多达官贵人同外宾，唔系个个都做到口架。而家轮到我坐喺度叹早茶，真系梳芙啊。”“伯爷婆，知你巴闭啦，当年你重学咗几句‘英国老鼠’教我添。爱群最正都系虾饺烧卖，同埋你啦。”

@隽永4 6 7 2 2：广州嘅地标都同高楼有关。63层、32层、27层，而喺27层之前，广州最高嘅大楼就系爱群大厦！1966年新爱群落成嗰阵，珠江两岸重冇乜嘢高楼大厦；从河南嗰边望过去，新旧爱群连成一体就好似一只停喺珠江边上嘅巨舰一样，十分威武。而家嘅爱群虽然冇咁起眼，但胜在历史悠久，呢啲就系新地标无可比拟噶啦！

(来源：南方都市报；采写/摄影：南都特约记者冯璐赟；特别鸣谢：广州老字号协会)